2013 жылдың шілде айында «Шұғыла» қоры «Береке» жобасы аясында «Мейірім конверттері» атты шара өткізуде. Бұл шараның мақсаты қиын жағдайға тап болған 472 отбасыға азық-түлікпен көмек көрсету үшін қаражат жинау.
«Мейірім Конверті» атты жаңа әлеуметтік науқаны қиын жағдайға тап болған отбасылардың тағдырына немқұрайлы қарамайтын жандарға арналған шара. «Мейірім Конверті» – әріптестеріңіз және достарыңызды қайырымдылыққа шақыратын ең тиімді жол. Сіз өз фирмаңыздағы қорымыздың сенімді тұлғасы ретінде тіркелген конверттерді әріптестеріңізге тарата аласыз. Осы арқылы фирманың әрбір мүшесі қайырымдылық игі істерге атсалысуға мүмкіндік алады. «Мейірім Конверті» қолына тиген адам отбасылардың нақты мұқтаждықтарымен танысып, мүмкіндігі келгенінше көмек қолын соза алады.
«Мейірім Конверті» қалай істейді?: Игі іске атсалысуға ниетті жандарға қор қызметкерлері немесе еріктілер «Мейірім Конвертін» таратады. Конверттің ішінде мұқтаждығымыздың (ақша жинау себебіміздің) сипаттамасы түсіндіріледі. Сіз мүмкіндігіңізге қарай дұрыс деп тапқан мөлшердегі қаражатты конвертке салып, жапсырып, конвертті берген адамға қайтарасыз.
Еріктілер конверттерді қор кеңсесіне алып келгеннен кейін қор комиссиясы арнайы белгіленген күні конверттерді ашып, конверт номерлеріне сәйкес жиналған қаражатты арнайы журналға тіркейді.
Жобамызды алаяқтардан қалай қорғаймыз?: Барлық кіріс-шығыс«Мейірім Конверттері» қорымыздың кеңсесінде қатаң тіркеуде болады. Әрбір конвертте жеке нөмірі (бұл номер арнайы талонымызда да болады) және қордың көк мөрі болады. «Мейірім Конвертін» тарататын адамдарға біз толық сенеміз. Егер қандайда бір күмәніңіз болса бізге қоңырау шалып, конвертіңіздің нөмерін айтып, қанша ақша келгенін біле аласыз. Конверттерді ашу кезіне қатысуға сіз ерікті бола аласыз.
Осы шара бойынша түскен қаражат туралы есеп конверттер толық қайтарылғаннан кейін сайтымызда жарияланады. Қазіргі таңда конверттердің тек жартысы ғана қайтарылды.