{module Лавка Добра Шымкент 2015}
«Игілік мекені» қайырымдылық жәрмеңкесі
Шымкент қаласы 31.05.2015
Мамыр айының 31-жұлдызында Шымкент қаласындағы Абай саябағында «Шұғыла» қоғамдық қорының ұйымдастыруымен 1 маусым – Балаларды қорғау күніне арналған «Игілік мекені» атты қайырымдылық жәрмеңкесі өтті.
Аталмыш шараға «Batoni» кондитерлік наубайханасы және «Шұғыла» қорының ерікті мүшелері ұсынған әртүрлі кондитерлік өнімдер, ұлттық сусын түрлері, балмұздақтар және түрлі қолөнер бұйымдары мен балаларға арналған ойыншықтар сатылды. Жәрмеңкеге келген ата-аналар мен бүлдіршіндер өздеріне ұнаған бұйымдарын сатып алды. Сонымен қатар, саябақтағы ағаштардың саясына мерекелік дастарқандар жайылып, көпшілік қауым өз бала-шағасымен көлеңкеде отырып тамақтанып, мәз-мейрам болды.
Мерекелік іс-шара барысында саябақ сахнасында жәрмеңкеге қатысушыларға арналып өнер және эстрада жұлдыздарының мерекелік концерті ұйымдастырылды. Концертте «Шаншар» продюсерлік орталығы, әншілер Заттыбек Көпбосынұлы, Нұр-Дастан дуэті, Мақпал Құлшынбаева, «Burhan Style» барабан шоуы, Аккордеоншы Махмуд Урумбаев, «Дисней» ұйымы және тағы басқа қаланың жас өнерпаздары өнер көрсетті.
Саябақ алаңқайында жәрмеңкеге қатысушылар арасында зілтемірмен гир тасын көтеру, ләңгі тебу, арқан тартыс, қол күрес секілді жарыстар ұйымдастырылды. Жарыс жеңімпаздары арнайы медальдармен және сыйлықтармен марапатталды. Жарысқа қатысушылардың барлығына дерлік «Шұғыла» қоғамдық қоры атынан естелік сыйлықтар табысталды.
Жәрмеңке барысында жиналған қаражат «Береке» жобасы аясында әлеуметтік жағдайы төмен, аз қамтылған отбасыларға азық-түлік таратуға жұмсалады.
«Шұғыла» қоғамдық қоры жоғары деңгейде өткен аталмыш іс-шараның ұйымдастырылуына өз үлесін қосқан барша игі жақсыларға және осы шараны өткізуге қолайлы жағдай жасаған Абай саябағы әкімшілігіне шынайы алғысымызды білдіреміз.